NÝTT óskilamunaverkefni fyrir grunnskóla

Kunnugleg sjón í grunnskólum landsins að vori: Heilu haugarnir af flíkum sem hafa orðið eftir í skólanum og ekki komist til eigenda sinna jafnóðum yfir veturinn. Málaflokkur sem fæstum þykir vænt um, margir eru hneykslaðir yfir og fáa langar að sinna.

Óskilamunir eru verkefni til að ráðast í rétt eins og hvað annað. Með auknum fatamerkingum er möguleiki að bera kennsl á föt barnanna okkar, með góðu aðgengi að fötum sem eru í óskilum verður leitin auðveldari og fleiri flíkur munu komast til skila til eigenda sinna.

Staðreyndin er að mörg börn hafa alltaf og munu alltaf gleyma og týna einhverju af fötum sínum og munum. Sumt týnist og finnst aldrei aftur en það þarf svo sannarlega ekki að eiga við um megnið af óskilamunum. Nú er komið af stað verkefni sem hægt er að nýta sér í baráttunni við óskilamunaskrímslið! 

Vilt þú fá frekari upplýsingar? Settu þig í samband við Virpi hér.

MERKJUM, LEITUM OG FINNUM

Undanfarin 4 ár hefur óskilamunaverkefni verið unnið á vegum foreldrafélagsins í skóla barna Virpi. Þar hefur verkefnastjórnin verið í höndum Virpi og hefur sjálfboðastarfið í tvígang fengið tilnefningu til Foreldraverðlauna á vegum Heimilis og skóla.Virpi hefur nú tekið saman efni til að geta boðið skólum og foreldrafélögum aðstoð við samskonar verkefni.

Í skólanum þar sem verkefnið hefur staðið síðastliðin ár hefur átt sér stað augljós vitundarvakning. Þar ríkir hreinlega stemmning í kringum óskilamunina: Starfsfólk og stjórnendur skólans finna mun frá því sem áður var, fleiri foreldrar eru í óða önn að merkja föt barnanna sinna og allir áhugasamir, jafnt börn sem foreldrar, geta leitað á mun auðveldari hátt að flíkum eftir flokkum. Þetta hefur leitt til verulega minnkaðs magns fata í óskilum þegar skólanum er lokað fyrir sumarfrí.

Tvisvar á vetri eru haldnir Merkjaleikar þar sem áhugasamir foreldrar koma saman eina kvöldstund með það að markmiði að koma öllum merktum flíkum í óskilum tilbaka til nemendanna. Hér má sjá innslag úr Landanum á RÚV frá því í febrúar 2019 um fyrstu Merkjaleikana.

Sérðu möguleika á álíka verkefni í þínum skóla? Komdu í hóp áhugasamra foreldra og starfsfólks í Facebook-hópnum Ó-ið úr óskilamunum!

Verkefnið hlaut undirbúningsstyrk frá Atvinnumálum kvenna vorið 2020 undir vinnuheitinu „Hvar er húfan mín?“. Verkefnið á einnig vel við á fleiri stöðum en grunnskólum, t.d. hjá íþróttafélögum,  og eru allir áhugasamir eindregið hvattir til að setja sig í samband við Virpi hér.